Lorelie M. Liwanag, Los Baños Times Collaborator at Focal Person ng Los Baños Persons with Disabilities Office
Noong Pebrero 2, opisyal na inaprubahan ang Municipal Ordinance 2016-1510. Sa ilalim ng ordinansa, magtatalaga ng Barangay Persons with Disabilities Coordinator (BPWDC) sa bawat barangay ng Los Baños. Ang mga BPWDC ang tutulong sa Office for Persons with Disabilities na magpatupad ng mga programa at proyekto sa bawat barangay.
Ang mga pangulo ng Barangay Persons with Disabilities Association ang tatayong BPWDCs. Mayroong 13 samahan ng Barangay Persons with Disabilities Association sa bayan ng Los Baños: Anos, Bambang, Batong Malake, Baybayin, Lalakay, Maahas, Malinta, Mayondon, Putho-Tuntungin, San Antonio, Tadlac, at Timugan. Layon ng samahan na mas paigtingin ang partisipasyon ng mga PWDs sa komunidad at palawigin ang kanilang oportunidad sa trabaho, edukasyon, paglinang ng kakayahan, at iba pang aspeto.
Bahagi din ng ordinansa ang tungkulin ng bawat BPWDC at ang pagbibigay ng isang opisina sa bawat barangay para sa kanila. Magkakaroon rin ng travel allowance ang mga BPWDC na nagkakahalaga ng limang daang piso (PhP 500.00) kada buwan. Ang pondo ay paghahatian ng internal revenue allotment (IRA) ng Los Baños Office of Persons with Disabilities mula sa munisipyo at ng bawat barangay.
Ang ordinansa ay sang-ayon sa Republic Act 9442 o ang Magna Carta for Persons with Disabilities, kung saan isinasaad ang tulong ng gobyerno sa mga may kapansanan.
Noong Enero 25, sa Sangguniang Bayan Conference Room ng munisipyo ng Los Baños, nagkaroon ng pagpupulong ang mga konsehal ng bayan na sina Antonio Kalaw, Cesar Cabrera, Julius Moliñawe, Benedicto Alborida, Ricardo Bagnes, at John Emmanuel Oliva, kasama ang mga opisyales ng Los Baños Federation of Persons with Disabilities (LBFPWDs) Inc. at ng Municipal Budget Officer Genoveva Poyaoan. Sa konseho ay tinalakay ang mga probisyon ng Municipal Ordinance 2016-1510.
Ang 13 Barangay Persons with Disabilities Association ay pinamumunuan ng LBFPWD at sinusuportahan ng Municipal Social Welfare and Development Office (MSWDO).